Guía práctica p'ayudar a les persones con diabetes a tener una alimentación afayadiza

Adrián Díaz ye 'Don Sacarino' en redes sociales

Más de 9.500 suscripciones en YouTube y 147.000 siguidores d’Instagram. Avaláu por estes cifres, Don Sacarino presenta’l segundu llibru. Ye una guía práctica p’ayudar a les persones con diabetes a tener una alimentación afayadiza.

Un llibru p’ayudar a les persones con diabetes a tener controlaos los sos niveles de glucosa pero que, cunta’l so autor Adrián Díaz, pue ser d’utilidá anque nun se sufra la enfermedá.

En redes sociales, esti enfermeru pediátricu ye Don Sacarino. Foi en 2016, cuando entamó a crear conteníu divulgativu sobre esta patoloxía. Una condición crónica, que polo menos nel casu de la diabetes tipu 2, pue prevenise pa, insiste, amenorgar el gastu sanitariu.

Sobre la gran cantidá de cuentes dende les que güei s’esparde conteníu venceyáu cola salú, alerta: hai que buscar un aval más allá de les redes sociales p’aseguranos de que quien crea y comparte failo con rigor y responsabilidá.