L'Albergue Covadonga recibe'l premiu Luis Noé Fernández de la Fundación Alimerka

La fundación asturiana Pájaro Azul, premiada na categoría de Llucha escontra la Fame

La Fundación Albergue Covadonga, la Fundación Pájaro Azul y el Grupu d'Investigación Alimentación, Nutrición, Desarrollu y Salú Mental (ANUT-DSM) del Institutu d'Investigación Científica Pere Virgili y la Universidá Rovira i Virgili recibieron esti miércoles los Premios Luis Noé Fernández de la Fundación Alimerka.

A la gala, que tuvo llugar nel Auditoriu Príncipe Felipe d'Uviéu, asistieron los representantes del Patronatu de la Fundación, y los xuraos de los galardones y de les entidaes sociales coles que la Fundación collabora cada añu, amás de directivos y responsables d’Alimerka.

Cada galardonáu recibió 20.000 euros en conceutu de financiamientu pal proyectu presentáu, según una obra gráfica de l'artista asturiana Helena Toraño.

Na categoría de Nutrición, el premiu foi apurríu al ANUT-DSM del Institutu d'Investigación Científica Pere Virgili y la Universidá Rovira i Virgili, un equipu lideráu pol doctor Jordi Salas Salvadó que contribuyó a verificar científicamente la dieta mediterránea y avanzar nel campu de la nutrición de precisión, según el xuráu.

Na modalidá d'Asistencia Alimentaria resultó premiada la Fundación Albergue Covadonga, una entidá xixonesa con un compromisu integral cola problemática del sinllarismu, que se convirtió en "un referente na integración y atención centrada na persona".

Na categoría de Llucha escontra la Fame recibió'l galardón la fundación asturiana Pájaro Azul, de la que'l xuráu valoró la so capacidá de tresformamientu social al traviés de la capacitación de comunidaes y colectivos vulnerables en República Democrática del Congu y Benín.