'Asiegu, aldea pensada', esta nueche n’Asturies selmanal

Ocho neños llenen d’allegría les cais del pueblu los 365 díes del añu

Asiegu ye un pueblu pequeñu de Cabrales, nel corazón de Los Picos d’Europa, que foi premiáu col Premiu Pueblu Exemplar d’Asturies 2019. Ocho neños llenen d’allegría les cais del pueblu los 365 díes del añu. Son los fíos de pareyes qu’apostaron por alloñase del ruíu urbanu.

Rocío Bueno y la so pareya vivíen y trabayaben n’Uviéu, pero siempres que tenían dalgún día llibre diben p’Asiegu. Un día decidieron quedar y agora tienen dos fíes, una pequeña quesería y un rebañu de 11 vaques de lleche.

Los Niembro son otra de les families más emprendedores d’Asiegu. La so 'Ruta'l Quesu y la Sidra' atraxo a 80.000 turistes al pueblu nos últimos 20 años. La familia tien pumaraes n’ecolóxico, produz sidra y corderu xaldu. Amás, convirtió’l chigre de sos güelos nun prestixosu restaurán 100% ensin gluten.

Asturies selmanal somórguiase esta nueche nel Pueblu Exemplar d’Asturies 2019 pa conocer les claves de la so prosperidá.

El programa emitirá tamién un reportaxe sobre’l Premiu Princesa d’Asturies de Ciencies Sociales, Alejandro Portes, al qu’Asturies selmanal entrevistó na Universidá de Princeton, en Nueva Jersey, Los Estaos Xuníos.

Sedrá esta nueche, dende les 21:30, en TPA.