'Los niños de humo', un llibru enllenu d'humor y d'amor poles cuenques

Relatos escritos pola periodista Aitana Castaño y ilustraos por Alfonso Zapico

'Los niños de humo' ye'l títulu de la colección de relatos ambientados nes cuenques mineres asturianes, escritos pola periodista Aitana Castaño y ilustraos por Alfonso Zapico.

El llibru, que bien llueu va tar en llibreríes, ye una memoria sentimental de la nuesa minería contada en clave d'humor.

Cuando Aitana Castaño conoció a Alfonso Zapico dambos entamaben les sos carreres profesionales. Ella, periodista de Llangréu y él, dibuxante de Blimea. Compartíen acentu y otres coses, eses que son propies de les cuenques obreres, como la llucha, la solidaridá o'l compañerismu. Nesi contestu, nacieron 'Los niños de humo'.

Foi nuna esposición de fotografía sobre trenes mineros falando con mineros onde surdió'l relatu que da títulu al llibru, nel qu'hai 10 relatos reales y 27 de ficción mui afondaos a la vida nes cuenques.

Editáu por Pez de Plata, en llibreríes a partir del 19 de payares, 'Los niños de humo' ye un llibru enllenu d'humor y d'amor, sobre manera d'amor poles cuenques.

El llibru ta fechu pola primer xeneración de les cuenques que nun entraron como xeneración a trabayar nes mines, pero la postrera que la pue cuntar porque la vivió.