'Pirineístas, mujeres y montañas' opta a ser la meyor película de monte y aventura nel Mendi Film de Bilbao
!['Pirineístas, mujeres y montañas' opta a ser la mejor película de montaña y aventura en el Mendi Film de Bilbao](https://www.rtpa.es/fotos//22/11/20221101094912_RTPA2729091.jpg)
La cinta amuesa les espediciones de la so directora, Isabel Díaz Novo, y rinde homenaxe a les muyeres pirineístes
El Documental 'Pirineístas, mujeres y montañas' de la directora y alpinista asturiana, Isabel Díaz Novo, seleccionáu ente otros 50 finalistes pa competir por ser la meyor película de monte y aventura del festival internacional Mendi Film de Bilbao. Una cinta na qu’al traviés de les sos espediciones, Isabel Díaz Novo, homenaxa a muyeres pirineístes que la historia del montañismu s’ocupó d’escaecer.
"¿Quién podría culpales? La timidez, la debilidá son coses naturales nelles, davezu gracioses y amables". Son les palabres que l’escritor francés Arbanère dexo escrites 1828 nel so llibru 'La Tabla de los Pirineos Franceses' sobre la supuesta debilidá del sexu femenín pa xubir montes. Asina entama esti documental nel que la so directora, la montañera asturiana Isabel Díaz Novo, rescata figures de muyeres pirineístes pa recordar qu’en tiempos d’esti caballeru de la Lexón d’Honor francesa yá había montañeres xubiendo les cumes de Pirineos.
Xunto a la británica Anne Lister, apaecen nomes importantes del pirineísmu como Rosalie Reimond, primer muyer en xubir el Pic du Midi o Margarita d’Angulema, entamadora de rutes de senderismu a medios del sieglu XVI. Xunto a elles Teófila Gao, nieta del 'Cainejo'. Xubió la sur d’El Picu Urriellu descalza y ensin cuerdes. Cuanto más se documentaba, la so directora más se decataba del escaezu nel que vivíen les sos protagonistes.
Un documental qu’en palabres de la directora de 'Pirineístas, mujeres y montañas', Isabel Díaz Novo, va más allá d’un sexu determináu pa falar de lo que más ama, el monte.
Son testimonios de muyeres que güei viven profesionalmente del monte y impresionantes imáxenes, de producción hispano-francesa, d’espediciones feches por Díaz Novo per L’Himalaya, L’Elbrús, Picos d’Europa y nes cueves del interior de Pirineos.
52 minutos de cinta que valieron a 'Pirineístas, mujeres y montañas", tar ente los 50 finalistes del Mendi Film Festival. Una cita internacional col meyor cine de monte del mundu que se celebrará ente’l 9 y el 18 d’avientu en Bilbao y qu’esti añu celebra la so decimoquinta edición.