
La serie amuesa la vida d’una bienhumorada y pestosa muyer de Lluanco
TPA estrena esta nueche, a les 22:30, “Cuca (retrato de una mujer)“, una serie de tres capítulos d’una hora basada nel llargumetraxe de non ficción que s’estrenó na pasada edición del Festival Internacional de Cine de Xixón, y que ganó’l Premiu al Meyor Llargumetraxe Asturianu.
La serie amuesa la vida de Cuca, una bienhumorada y prestosa muyer de Lluanco que, a los sos 87 años y a pesar de los problemes de salú, afronta la vida con optimismu y alegría.
Amás de ser una comedia de la vida, Cuca (retrato de una mujer), ye un homenaxe a una xeneración de muyeres asturianes ensin les que sedría imposible entender la nuestra tierra.
Nel primer capítulu averámosnos a la personalidá de Cuca, descubriendo dalgunes de les circunstancies personales d’esa singular muyer. Acompañarémosla nos sos llabores de caldía, asistiremos a la so rellación con unu de los sos fíos, y falarános de los sos recuerdos de neña mientres enseña a facer marañueles a una adolescente lluanquina, testigu de la sabiduría popular que busca tresmitise a les xeneraciones más moces.