Baxa'l númberu d'asturianos que viven nel esterior

Presentáu'l 'Libro Blanco de la Emigración' qu'ellabora Compromisu Asturies XXI

En 2022 había cuasi un 3,5% menos d'asturianos viviendo nel esterior. Son persones mayores de 65 años, sobre manera de países de Suramérica.

L'enclín ta cambiando y cada vez hai más emigrantes asturianos n'edá llaboral, de 16 a 65 años. La baxada en 2022 d'esti grupu de mayores de 65, de forma notable por casu n'Arxentina o Venezuela, fixo qu'al respective de 2021 haya un 3,48% menos d'asturianos fuera de la nuesa comunidá, esplica Reyes Ceñal.

Son datos del 'Libro Blanco de la Emigración' qu'ellabora Compromisu Asturies XXI. Cada vez colen más mozos atraíos por ufiertes de toles partes del mundu, pero sobre manera dende la Comunidá de Madrid, asegura Eduardo Sánchez.

Dende Compromisu Asturies XXI ven necesario conocer meyor a la población enantes y saber por qué coló quien yá lo fixo y que l'Observatoriu de la Emigración seya una realidá en 2024.

Un compromisu del Gobiernu, que coincide na necesidá d'ufiertar ferramientes dixitales, esplica Olaya Romano, directora xeneral d'Emigración y Polítiques de Torna.

Pa too ello ye clave la relación ente los distintos axentes y el llabor de los medios de comunicación, al traviés de los que llega la realidá d'Asturies a los que tán fuera.