Cadavéu prepara rapes y alfilaes pa que preben los reis el sábadu

Un encargu real pa la celebración del Premiu al Pueblu Exemplar d'esti añu

De los fornos de Josefina Castro saldrán na madrugada d’esti sábadu 40 rapes de maíz, otres tantes empanaes, y 30 alfilaes. Ye l’encargu que recibió esta repostera p’alimentar a los reis y a tolos invitados qu’asistirán en Cadavéu a la entrega del Premiu al Pueblu Exemplar d’Asturies. Los nervios nesti obrador asitiáu en Vil.lar, na parte alta de L.luarca, tán yá a flor de piel.

Un arguyu pa ella y pa les dos trabayadores que trabayen nun pequeñu negociu creáu va hace 10 años y col que s’enfrenten agora a un gran retu, amosar la comida tradicional de la zona cola rapa, a base de maíz y productos del gochu, y les dulces alfilaes.