Cadavéu remata los preparativos pa la entrega del Premiu al Pueblu Exemplar

Una parte esencial de los actos tendrán llugar nel campu de La Regalina

En Cadavéu tán a menos de 48 hores de la llegada de los reis pa entregar el Premiu al Pueblu Exemplar. Güei ye día d’ensayos y de preparativos nun pueblu que s’engalanó pa vivir ún de los díes más importantes de la so historia.

Nel prau frente a la ilesia de Cadavéu tendrán llugar los discursos oficiales d’un actu históricu pa los vecinos del pueblu. Güei ye día de llimpieza, de retoques, d’axustar la pintura de les macetes y de fachaes. Quítense los contenedores y precíntense otros.

Los nervios van a más, a menos de 48 hores de la llegada de los reis.

Una parte esencial de los actos tendrán llugar nel campu de La Regalina. Nesti privilexáu llugar un grupu de vecinos lleven tola selmana ensayando dalgunos de los bailles tradicionales de la zona, que podrán conocer don Felipe y doña Letizia. Nada pue fallar. Poro, la implicación vecinal ye máxima.

Na carpa daráse de comer a 600 persones dempués del actu d’entrega. Sedrá’l puntu y final a una xornada histórica nel pueblu. Una xornada que rematará pela nueche, yá ensin los reis, con una fiesta per tolo alto.