Cayetana Guillén Cuervo asegura que la Llei d'Enseñances Artístiques sedrá un llogru pal sector

Presentada la Escuela de Branu de l'Academia de les Artes Escéniques d'España n'Avilés

La presidenta de l’Academia de les Artes Escéniques d’España, Cayetana Guillén Cuervo, presentó esta mañana n’Avilés una nueva edición de la escuela de branu de l’academia. Nuna entrevista a TPA Noticies, aseguró que la Llei d’Enseñances Artístiques na que trabaya’l Gobiernu central ye un llogru pal sector.

Pa Cayetana Guillén Cuervo que l’arte se convierta en titulación universitaria ye daqué que dignifica la profesión. La Presidenta de la Academia de les Artes Escéniques d’España asegura que la Llei d’Enseñances Artístiques ye un llogru pa la democracia.

Trabayar nel desendolcu d’esta llei y nel estatutu del artista ye una prioridá pa l’academia, cuando cumple dos años al frente de la mesma.

Amás Cayetana Guillén Cuervo considera clave, nos años vinientes, siguir apostando por conectar l’Academia de les Artes Escéniques d’España con otres asociaciones del restu del mundu, que salvaguarden la cultura.

Cayetana Guillén Cuervo tuvo n’Avilés pa presentar la sesta edición de la Escuela de Branu de l’Academia de les Artes Escéniques d’España. Una escuela qu’arranca’l llunes viniente nel Teatru Palacio Valdés, que ye la segunda vegada que celebra esta cita.

Un total de 86 alumnos y alumnes esfrutarán nuna selmana de clases maxistrales y talleres prácticos de la mano de docentes internacionales como Brian Rhinehart, Jarek Bielski o Helena Pimienta. Ye la primer vegada amás que l’Actors Studios de Nueva York participa na escuela.