Cume en L'Urriellu pa pidir a gritos investigación pa la ELA

Escalada hestórica de Miguel Ángel Roldán

Sobre les 15:30 y dempués de cuatro hores y media d'esfuerzu, l'andaluz Miguel Ángel Roldán llogró'l so retu d'escalar la cara sur del emblemáticu picu asturianu.

El triatleta y enfermu d'ELA facía cume en L' Uriellu. El so gritu ye'l terceru de los cinco que propón una iniciativa pa esixir investigación sobro la Esclerosis Llateral Amiotrófica. Una enfermedá del sistema nerviosu qu'ataca a les neurones que tán nel celebru y la médula espinal y controlen el movimientu de los músculos. L'orixe desconozse na mayoría de los casos.

La espedición entamaba a les 11:00. Con fuerte vientu, tuvo sofitáu por compañeros como l'alpinista y cámara del programa 'Al Filo de lo Imposible', José Carlos Tamayo.

Roldán tuvo encordáu cuasi de la mano al guía asturianu Fernando Calvo, que nos cuntó que los primeros 12 metros, mui pindios, fueron mui duros porque Roldán malapenes tien fuerza nos brazos. Cúntennos que peleó tanto que nel últimu tramu enfotóse, dicen, hasta faer cume solu.

Tola fazaña tuvo retresmitida en directo per una productora vasca: seis cámares, un dron y un set de realización.

L'equipu, unes 40 persones, faen nueche nel abellugu, dende onde per teléfonu pidieron agradecer el llabor de la Guardia Civil, l'asociación d'hosteleros Destín Cabrales y el Conceyu.​