El Palaciu Arzobispal d'Uviéu acueye'l veloriu de Gabino Díaz Merchán

Terán recuerda la intervención de Díaz Merchán na fuelga ​de los trabayadores de Duro Felguera

El presidente del Principáu, Adrián Barbón, señaló güei que l'arzobispu eméritu d'Uviéu Gabino Díaz Merchán, muertu apocayá, foi unu de los pilares de la reconciliación n'Asturies tres la Guerra Civil y la dictadura franquista xunto al primer xefe del Executivu asturianu, Rafael Fernández, cuando tuvieron al frente del Gobiernu y de la diócesis.

Barbón, qu'ayeri robló'l decretu pa declarar mañana una xornada de llutu oficial n'Asturies coincidiendo col funeral por Díaz Merchán que se va celebrar na Catedral, fixo estes afirmaciones tres dir al veloriu que güei va tar abiertu nel Palaciu Arzobispal en memoria del que fuera arzobispu d'Uviéu trenta y tres años.

Al veloriu, a la que tamién foi la delegada del Gobiernu n'Asturies, Delia Losa, fueron tamién otros representantes políticos como la presidenta rexonal del PP, Teresa Mallada, p'amosa-y el so agradecimientu "por tolo que fixo a lo llargo de la so vida" pol Principáu y el voceru de Foru, Adrián Pumares.

A la sala del Palaciu Arzobispal onde s'instaló'l veloriu, onde s'allugó una semeya de Díaz Merchán y una reproducción de la Virxe de Cuadonga y na que taben l'arzobispu d'Uviéu, Jesús Sanz Montes, y dellos familiares de Díaz Merchán, foi tamién la vocera d'IX nel parlamentu asturianu, Ángela Vallina, que destacó'l so "talante cercanu y pegáu a la realidá".

Terán recuerda la intervención de Díaz Merchán na fuelga ​de fame de los trabayadores de Duro Felguera

Ente quien s'averó a despidise de Gabino Díaz Merchán ta Manuel Terán, voceru de los trabayadores de Duro Felguera que se zarraron na catedral 318 díes en protesta pol despidu de 39 emplegaos.

Recuerden la intervención de Díaz Merchán na fuelga de fame que s'allargó 50 díes. Los trabayadores namás taben dispuestos a rompela si la compañía se sentaba a negociar. Cuarenta cures asturianos roblaron entós un manifiestu pidiendo una intervención y un compromisu colos trabayadores.