El rei ve "de xusticia" que s'ayude a los pueblos que sufren la despoblación

Felipe VI considera a Asiegu un modelu de "convivencia pacífica"

Felipe VI aseguró esti sábadu que ye "de xusticia" que l'Alministración facilite "sofitu y ayuda" a aquellos conceyos de les zones rurales que sufren despoblamientu y avieyamientu poblacional, "un problema tan grave". Les sos consecuencies afecten a tolos ciudadanos.

El rei llanzó esti mensaxe de respaldu a la llamada España vaciada na visita que, cola reina y les sos fíes, fixo a Asiegu, ganador anguaño del premiu al pueblu exemplar d'Asturies y al que don Felipe consideró un modelu de "convivencia pacífica".

Asiegu, una aldea de menos d'un centenar d'habitantes allugada nel conceyu de Cabrales, nos Picos d'Europa, foi estremada poles sos iniciatives pa combatir la despoblación y xenerar actividá económica pa que los mozos queden.

"Asturies y toa España, que viven el despoblamientu y l'avieyamientu de les zones rurales, tienen qu'atopar na vuesa actitú y calter entamador caminos p'arreglar un problema tan grave. Les sos consecuencies afecten a tolos españoles", sostuvo'l rei na so intervención.

N'opinión del xefe del Estáu, ye "de xusticia" que los pueblos que ven colar a los sos habitantes atopen "na Alministración el sofitu y l'ayuda afayadiza" pa retenelos.

Pueblos como Asiegu representen, según don Felipe, "la esperanza de que'l campu tien futuru" y de que "ye posible revitalizar la vida rural y revertir les consecuencies negatives del so estáu actual".

El rei consideró "mui emotiva" la visita a la pedanía cabraliega por ser la primer vegada que lu acompañen la princesa y la so hermana.

"Teníen unes ganes inmenses de venir. Deseamos que sientan, como la reina y yo sentimos toos estos años, el ciñu de los asturianos", aseguró.