Entamen les deliberaciones del premiu Princesa de Cooperación

Un total de 19 candidatures opten al premiu

El xuráu del Premiu Princesa d'Asturies de Cooperación Internacional 2017 entamó güei les sos deliberaciones pa conceder el galardón ente les diecinueve candidatures presentaes, una llista na que dellos miembros del tribunal destacaron la renovación de les propuestes remitíes a la Fundación.

Ensin un favoritu claru, a xuiciu de los miembros del xuráu que preside l'ex-ministru d'Asuntos Esteriores Marcelino Oreja, ente los nomes que trescendieron sí apaecen delles candidatures yá avezaes n'exercicios anteriores como la del ex-secretariu xeneral de la ONU Ban Ki-Moon o la del líder d'U2, Bono.

De la rellación de candidatos son parte amás la Feria Internacional del Llibru de Guadalajara, que tamién optó al de Comunicación y Humanidaes, y Alejandro Solalinde.

D'esi ámbitu vien tamién la propuesta de premiar a l'asociación ACOES (Cooperación Hondures), una entidá dedicada a la erradicación de la probitú nesi país centroamericanu.

"Nun hai un claru favoritu, hai de too y un buen nivel", afirmó a los periodistes nel alcuentru avezáu col xuráu Rafael Matesanz, tres asegurar enterase entá"más bien poco" de la so xubilación tres 27 años al frente de la Organización Nacional de Tresplantes, qu'algamó en 2010 esti premiu.

Pa la periodista Rosa María Calaf, anque dar nomes sedría "nocivo" pa los candidatos, nesta ocasión sí ve propuestes "venceyaes mui a pie de cai" envede "xefes de gobiernos, presidentes o grandes organismos internacionales" más conocíos que, alvirtió, "nun ye que nun faigan un buen trabayu, pero esi ye'l so trabayu".

Tamién el secretariu xeneral de WWF-España, Juan Carlos del Olmo Castillejos, amosóse satisfechu de la entrada de dellos candidatos nuevos respecto a 2016 y que, en munchos casos, trabayen "sobre'l terrén en llugares de conflictu" n'ámbitos como la educación, la salú o l'ayuda humanitaria.

El pasáu añu algamaron el premiu la Convención Marcu de Naciones Xuníes sobre'l Cambiu Climáticu (UNFCC) y l'Alcuerdu de París y tamién, enre otros, Wikipedia; la Fundación Fulbright; la sociedá Max Planck; la Cruz Roja y la Media Luna Roja; Al Gore; la Fundación Bill y Melinda Gates; Helmut Kohl; Mario Soares; Isaac Rabin y Yaser Arafat; Frederick De Klerk y Nelson Mandela.

Nesta XXXVII edición de los Premios Princesa concediéronse yá los correspondientes a les Artes, que llevó'l polifacéticu creador sudafricanu William Kentridge, y Comunicación y Humanidaes, que llevó'l grupu humorístico-musical arxentín Les Luthiers.

L'actu d'entrega de los Premios Princesa de Asturias fadráse, como ye tradicional, n'ochobre nel Teatru Campuamor d'Uviéu, nuna solemne ceremonia presidida polos reis.

Cada Premiu Princesa d'Asturies ta dotáu cola reproducción d'una escultura de Joan Miró -símbolu representativu del premiu-, la cantidá en metálico de 50.000 euros, un diploma y una insignia.