Exemplar tamién cola Covid

La familia real apurre'l galardón a Somáu

Somáu yá tien el so galardón de Pueblu Exemplar d'Asturies. El tiempu acompañó nesti día especial, non les circunstancies qu'obligaron a llendar los movimientos de los vecinos, a los que s'allugó en cuadrícules.

Quedaron ensin dar la mano a los reis y les sos fíes y ensin semeyes de cerca, pero tuvieron a la familia real nel so pueblu, daqué que nun taba claro pola pandemia.

Menos de 300 vecinos hai censaos nel guapu pueblu de Somáu, en Pravia, y ellos son los únicos que pudieron salir a la cai pa esfrutar d'esti día históricu con llendes.

El percorríu dafechu viose en directo en TPA nun programa especial.

Anque anguaño los saludos tuvieron les restricciones derivaes de la pandemia, la familia real nun escaeció a nengún presente nel so percorríu pel legáu indianu de Somáu.

Ente otres edificaciones, visitaron La Villa Radis y La Casona. Equí guiolos Asunción, que vivió esta visita como mui emotiva, dempués de morrer el so home en marzu con coronavirus. Él yera unu de los herederos.

Dempués, conocieron El Nocéu, la casa familiar del primer indianu de Somáu qu'emigró a Cuba con 12 años y tornó con una fortuna. Un arguyu de visita pa los propietarios.

Tamién un alcuentru mui cercanu cola asociación d'amigos de Somáu, formada por un grupu de vecines conocíu como'l grupu de "llabores". Ellí delles neñes del grupu regalaron a les princeses oxetos de costura.

Nesi espaciu, más abiertu que'l de les finques indianes, los vecinos y visitantes pudieron tar presentes. Ficiéronlo estremaos por families, allugaos en cuadros marcaos nel suelu.

Saludos tamién a los docentes de la escuela de Somáu y a los nueve escolinos del pueblu. Alumnos qu'ellaboraron dibuxos pa la visita real y que-yos dieron la bienvenida con dos ramos de flores de papel, unu pa la princesa d'Asturies y otru pa la infanta Sofía.