Éxitu del primer llibru de semeyes dedicáu a Bisuyu

Andrea Ramos yá tien en mente un nuevu trabayu en Cangas del Narcea

Andrea Ramos acaba d’asoleyar un llibru de semeyes de Bisuyu. Esta fotógrafa madrilana, pero con raigaños en Cangas del Narcea, busca amosar en 100 semeyes cómo ye esti pueblu cangués, al traviés de la so xente y munchos de los sos requexos.

A Andrea Ramos intrigába-y cómo sedría la vida nesos pueblos espardíos pel suroccidente asturianu. Unos pueblos de los que namás sabía’l nome cuando venía a pasar les temporaes de branu dende Madrid hasta Cangas del Narcea.

Les vivencies que-y cuntó so padre sobre Bisuyu fueron la chispa que la animó a facer un llibru con 100 semeyes sobre esti pueblu. Foi un proyectu lentu, fechu con cariñu, qu’entamó en 2012, y qu’amuesa’l Bisuyu d’agora.

Una de les coses que más-y sorprendieron foi l’amabilidá de los vecinos, que la dexaron, ensin conocela, entrar nes sos casas.

El llibru, que cunta con una tirada de 500 exemplares, salió a la venta esta selmana, con una gran acoyida nel conceyu.

Bisuyu ye’l primer proyectu fotográficu de llargu percorríu d’Andrea Ramos, que yá tien en mente un nuevu trabayu tamién na zona de Cangas del Narcea.