El Plan de la Llucha escontra la Ludopatía insistirá nos más mozos

Xornada de xuegu responsable n’Uviéu

El conseyeru de Presidencia y Participación Ciudadana del Principáu, Guillermo Martínez, declaró que’l Plan de la Llucha escontra la Ludopatía insistirá na población más mozo, según la observación de delles tendencies nos xuegos en llinia.

Martínez destacó qu’esti sector, que da trabayu a 813 persones en 130 empreses, ta mui reguláu y interveníu "porque tien que tener toles garantíes, tien que protexer a los menores y a les persones con dalgún tipu de problema d’adicción, a los ludópates".

Nesi sen, recalcó qu’Asturies tien la llei más avanzada d’España y dixo que’l Gobiernu asturianu "foi bien áxil nel so desendolcu y consecuente col mandatu de la Xunta Xeneral pa desendolcar la normativa".

El conseyeru de Presidencia fizo estes consideraciones nel actu de presentación de la IV Xornada del Xuegu Responsable del Principáu d’Asturies, que se celebra n’Uviéu por mor del Día Internacional del Xuegu Responsable.

Martínez agradeció a la Dirección Xeneral d’Interior, a l’Asociación de Ludopatía y a les persones qu’intervienen como ponentes nestes xornaes que consideró como una referencia nacional nesta materia.