L'implante vestibular, el futuru pa pacientes con problemes graves nel oyíu internu

El dispositivu ye un clon modificáu del implante coclear

Los espertos en Otoneuroloxía creen qu'en cinco años los implantes vestibulares van poder incorporase a la práctica clínica nos pacientes con problemes graves d'equilibriu rellacionaos col oyíu.

Sedría una alternativa terapéutica novedosa pa los casos más difíciles, aquellos onde los fármacos nun llogren controlar esti tipu de patoloxíes que provoquen vértigos y mareos.

El dispositivu ye un clon modificáu del implante coclear pero ésti estimula les funciones del oyíu internu, el responsable del equilibriu. Pa ello, los ciruxanos alluguen unos sensores na cabeza del paciente, que detecten tolos movimientos que'l sistema vestibular yá nun capta.

Esos estímulos reboten al traviés d'un aparatu que s'alluga dientro del oyíu al celebru, evitando los vértigos y mareos.

Namás 13 pacientes de tol mundu yá porten esti implante vestibular. Los resultaos entá son de llaboratoriu pero la responsable del desarrollu d'esti neuroprótesis en Suiza, envalora qu'en cinco años tea comercializada.

Cada selmana van 60 pacientes a esta unidá d'Otorrinolaringoloxía del HUCA, pero non toos sedríen candidatos a esti incipiente implante vestibular. Namás aquellos que nun respuenden a los tratamientos actuales como les inyecciones intratimpánicas.

L'anuncia d'esta meyora fízose énte un centenar d'otorrinos de tol país nuna xornada sobre la enfermedá de Meniere nel HUCA, una patoloxía que carecen unos 2.000 asturianos.