La Biblioteca de Castropol sigue celebrando'l so centenariu

Jonás Fernández entrega 40 nueves robles en sofitu del nuevu 'Manifiesto por la cultura'

La Biblioteca de Castropol sigue celebrando’l so centenariu y ta recoyendo robles en sofitu del nuevu 'Manifiesto por la cultura' que quier ser un homenaxe al que crearon va 10 décades.

L’eurodiputáu socialista, Jonás Fernández, entregó güei dalgunes de les 40 nueves robles del manifiestu 'Por nuestra cultura'. Toes son d’eurodiputaos de cinco grupos políticos, de dereches y d’izquierdes, y de 12 países de la Xunión.

Quieren sofitar, d’esta forma, un manifiestu redactáu pol escritor Gonzalo Moure que trata de fomentar la llectura y la cultura y qu’emula al orixinal, a esi que s’asoleyó en 1921 gracies a un grupu d’estudiantes del conceyu que trataben de crear una biblioteca. Esta nació meses dempués, va un sieglu, y convirtióse nun motor de cambéu.

Güei, 10 décades dempués, l’equipamientu cunta con cientos de volúmenes y unos fieles llectores que faen d’esta biblioteca un referente cultural na fastera.