La fotógrafa María Clauss espón na Selmana Negra

Una serie galardonada col Premiu Internacional de Fotografía Humanitaria Luis Valtueña

Verdá, xusticia y reparación. Tres palabres que guiaron el trabayu de María Clauss. Una serie fotográfica que-y valió'l Premiu Internacional de Fotografía Humanitaria Luis Valtueña y que se pue ver na biblioteca Xovellanos de Xixón hasta'l próximu 30 de xunetu.

'Donde no habite el olvido' retrata a muyeres y homes qu'anguaño siguen ensin poder enterrar a los familiares. Clauss viaxó con ellos hasta llugares de represión y memoria. Acompañólos pa contar les sos histories al traviés de la fotografía, valiéndose de la imaxe pa reconstruyir el pasáu nel momentu presente.
L'escenariu d'estes fotos ye Huelva y la so cuenca minera, una zona que sufrió especialmente la represión na Guerra Civil. Calcúlase qu'unes 1.000 persones fueron fusilaes nesti entornu. Enclaves que Clauss capturó col so oxetivu y que Médicos del Mundu reconoz agora con esti prestixosu galardón.