La hestoria d'Hullas del Coto Cortés recupérase al traviés d'una amuesa fotográfica

La esposición va tar nel Centru d'Interpretación de Fontes del Narcea de Zarréu, Casa Florencio, hasta'l 10 d'avientu

Que nun se pierda'l legáu de lo qu'Hullas del Coto Cortés significó pa la contorna. Con esa intención nacía en 2019 l'Asociación de ex-mineros de la empresa. Esta esposición con más de 150 fotografíes de tolos tiempos ye un primer pasu. Axuntáronse imáxenes de los llabores, de les instalaciones y de los mineros, y útiles de trabayu y documentación, anque llamenten que nun-yos lo ponen fácil.

Anque la hestoria de la empresa vien de les primeres décades del sieglu XX, hai fotografíes dende los años 40, hasta que pasó a ser Coto Minero Cantábrico, yá nos años 2000. Con cuasi 700 emplegaos nos sos meyores tiempos, nun s'entiende la hestoria del últimu sieglu nel conceyu de Degaña ensin la esistencia d'Hullas del Coto Cortés.

La esposición va tar nel Centru d'Interpretación de Fontes del Narcea de Zarréu, Casa Florencio, hasta'l 10 d'avientu y la intención ye llevala dempués a Degaña y L.laciana. Y nun se refuga buscar un espaciu pa convertila en permanente.