La poeta rumana Ana Blandiana, Premiu Princesa d'Asturies de les Lletres 2024

El xuráu destaca d'Ana Blandiana la so gran capacidá de resistencia frente a la censura

La poeta, pero tamién prosista, ensayista y periodista, Ana Blandiana, una de les figures más relevantes y internacionales del panorama lliterariu rumanu y destacada activista política, foi galardonada esti xueves col Premiu Princesa d'Asturies de les Lletres 2024.

Autora de más d'una trentena de llibros de poesía, noveles y ensayos que fueron traducíos a más de 25 idiomes, la candidatura de Blandiana (Timișoara, 1942) ganó ente les 38 qu'optaben a esti galardón, que na pasada edición recayó nel escritor y traductor xaponés Haruki Murakami.

El xuráu que-y dio'l premiu destacó que Blandiana, primer persona d'orixe rumanu en llograr un Princesa d'Asturies, ye "una creadora radicalmente singular" con una "poesía indómita" que reflexa una "capacidá estraordinaria de resistencia frente a la censura".