Les Luthiers, premiu Princesa de Comunicación y Humanidaes 2017

Premiaos por ser "un referente de la llibertá"

El grupu arxentín Les Luthiers, que se caracteriza por amestar l’humor cola música y l’usu d’instrumentos caseros, foi premiáu güei n’Uviéu col Premiu Princesa d’Asturies de Comunicación y Humanidaes 2017 por ser un "espeyu críticu y un referente de llibertá na sociedá d’anguaño".

El fallu, dau a conocer esti mediudía pol presidente del xuráu, el filólogu Víctor García de la Concha, reconoz qu’en mediu sieglu, esti grupu nacíu nel ámbitu universitariu de Buenos Aires supo convertise en "unu de los comunicadores cimeros de la cultura iberoamericana dende la creación artística y l’humor".

"El so tratamientu orixinal del llinguaxe, de los instrumentos musicales y de l’acción escénica atrái a cientos de miles d’espectadores de toles xeneraciones, que ficieron a Les Luthiers un espeyu críticu y un referente de llibertá na sociedá d’anguaño", destaca’l fallu del xuráu.

La so candidatura, que yá fuere presentada n’años anteriores, impúnxose nesta ocasión a les del biólogu especialista n’evolución Francisco José Ayala, a la del director del Washington Post, Martin Baron, y a la del filósofu mexicanu Miguel León-Portilla, ente otros.

En total, presentárense 28 candidatures de 12 países pa esti premiu, col que l’añu pasáu foi premiáu’l fotoperiodista de los Estaox Xuníos James Nachtwey, maestru de la fotografía de guerra y comprometíu testigu de los desastres humanitarios.

El Premiu de Comunicación y Humanidaes ye’l segundu de los ocho premios que concede la Fundación en fallase esti añu, dempués de que la selmana pasada se ficiere col de les Artes el polifacéticu creador sudafricanu William Kentridge.