Los reis y les sos fíes lleguen a Uviéu

El sábadu dirán a Somáu pa dar el premiu al pueblu exemplar d’Asturies 2020

Los reis y les sos fíes llegaron esti xueves a Uviéu pa presidir delles actividaes al rodiu de la entrega de los premios Princesa d’Asturies 2020, unos premios marcaos nesta edición pola pandemia de coronavirus.

Dempués de la so llegada a la capital asturiana, Felipe VI, la reina Letizia, la princesa Leonor y la infanta Sofía fueron a l’antigua fábrica d’armes de La Vega. Nes sos instalaciones desendolcáronse tola selmana dellos eventos culturales entamaos pola Fundación Princesa d’Asturies por mor de la entrega de los premios.

Los cuatro miembros de la Familia Real fueron recibíos pol presidente d’Asturies, Adrián Barbón, y en representación del Gobiernu, tuvieron acompañaos pol ministru del Interior, Fernando Grande Marlaska.

Tamién los recibieron otres autoridaes y personalidaes como l’alcalde d’Uviéu, Alfredo Canteli, y el presidente y la directora xeneral de la Fundación Princesa d’Asturies, Luis Fernández Vega y Teresa Sanjurjo.

El sábadu dirán a Somáu, nel conceyu de Pravia, pa dar el premiu al pueblu exemplar d’Asturies 2020.