Los reis y les sos fíes visiten Asiegu, Pueblu Exemplar d'Asturies 2019
![Leonor descubre la placa conmemorativa del Asiegu como Pueblo Ejemplar 2019](https://www.rtpa.es/fotos//19/10/20191019202029_20191019placa.jpg)
L'agua restó coloríu al recibimientu preparáu polos vecinos del llugar
La princesa Leonor, los reis y la infanta Sofía, entamaron esti sábadu la so visita a l'aldega d’Asiegu, nos Picos d'Europa, galardonada como Pueblu exemplar d'Asturies, metanes l’orbayu que restó coloríu al recibimientu preparáu polos sos vecinos.
El percorríu per Asiegu pon puntu final a la estancia de tres díes de la Familia Real nel Principáu por mor del estrenu de Leonor de Borbón nos Premios Princesa d'Asturies. Na so ceremonia pronunció'l so primer discursu ayeri, vienres.
Asiegu, allugada nel conceyu de Cabrales, cuenta con un centenar d'habitantes, anque la visita real axuntó a otros vecinos de la zona, que van participar na comida de campu cola que se va a cerrar la xornada.
Los reis y les sos fíes, que fueron recibíos poles autoridaes, pasiaron y pararon en distintos puntos del pueblu, ente ellos, dos queseríes onde s'ellaboren el quesu de Cabrales, un llagar de sidra y una casa tradicional asturiana.
A la so llegada, con cerca de media hora de retrasu, guardáronse del agua con dos paragües nel momentu de baxar del vehículu, ente los sones de bienvenida de la gaita y el tambor.
Asiegu foi galardonáu col premiu de pueblu exemplar pol so modelu de desarrollu rural, que dexó frenar el despoblamientu de l'aldega y la degradación del so paisaxe.
Les iniciatives de los sos vecinos dexaron abrir dellos negocios de ganadería, agroalimentación y turismu rural.
TPA ufiertó en directo, dende Asiegu, la retresmisión del actu d'entrega del Premiu al Pueblu Exemplar d'Asturies 2019.