Mañana d'emociones na fuexa común n'El Rellán, en Grau

L'actividá céntrase agora na zona próxima a la cubil

L'Asociación pa la Recuperación de la Memoria Histórica (ARMH) atopó los restos óseos de 12 persones na fuexa común d'El Rellán, en Grau, namás dos díes depués de retomar los trabayos na finca d'El Chabolu.

Dolores Fernández foi güei la primera en llegar a la fuexa común n'El Rellán. Tenía namás unos meses cuando so padre foi asesináu. A los sos 84 años, frente a la fuexa onde cree que pudo ser asesináu, ye incapaz de falar.

A los sos 89 años a Sabino Fernández la mirada perdíase-y ente los restos descubiertos. Quiciabes dalgún seya'l padre que perdió con seis años y a María Luisa Flórez, de 95 años, entá-y queda enerxía pa siguir buscando a so padre.

Son tres exemplos de los munchos familiares que s'averaron pa conocer la evolución de los trabayos. L'actividá céntraze na zona próxima a la cubil, onde apaecieron dellos cranios más.

Ye'l gritu silenciosu d'un pasáu guardáu más de 80 años. La fuexa d'El Rellán por fin empieza a falar.