Memoria y reflexón en Llaboral Centru d'Arte

Parasimón ye una instalación visual y sonora de Juanjo Palacios y Carlos Suárez

Celesto García, vecín de Payares, reveló un secretu que llevaba años guardando. Yera un secretu solapáu toa una vida. Siendo un neñu, vio como unos verdugos asesinaben a un grupu de ventidós presos. Foi'l tiempu de la represión franquista n'Asturies, foi un crime colectivu nel enclave de Parasimón.

Celesto ve cola mirada furtiva d'un neñu, escondíu ente los árboles. De vieyu, apurrió un datu fundamental: unu de los represaliaos yera Luis Cienfuegos, vecín d'Ayer dende'l so matrimoniu con Amadora. Cúntenlo los artistes Juanjo Palacios y Carlos Suárez.

La tierra cunta hestories. Nes fondures de lo visible síguense guaradando relatos de momentos infames de la humanidá, de momentos deplorables de la hestoria d'un país.

Les víctimes del primer enterramientu fueron asesinaes con un númberu de bales desproporcionáu. O los verdugos yeren poco esperimentaos o taben mui nerviosos. Los executores llevaron a los represaliaos a una zona escondida nun monte d'abetos. Agora tase pendiente d'un estudiu d'ADN fechu a descendientes de 16 de los 22 asesinaos. Esplícalo Begoña Collada, directora Xeneral de Memoria Democrática del Principáu d'Asturies.

Los prisioneros fueron obligaos a ponese de rodíes, énte'l pelotón de fusilamientu. Fueron obligaos a humildase nel so últimu momentu. Depués fueron soterraos con cuidáu, por humanidá, por un maestru d'escuela y polos sos alumnos. Los enterradores fueron neños.