Metrópoli y Riverland caltienen les feches previstes

Los cartelos tán formaos por artistes nacionales

Los festivales Metrópoli y Riverland, dos de los eventos culturales con mayor asistencia programaos pa esti branu n’Asturies, caltienen les feches previstes. Asina s’asegura dende 2Monkeys, empresa entamadora de dambes cites.

Dende 2Monkeys amuésense optimistes. Confíase en que pal 26 de xunu, fecha na qu’entama una nueva edición de Metrópoli, la situación tea normalizada, y qu’esta edición, na que tán previstes actuaciones como les d’Amaral y El Barrio, se desendolque con normalidá.

Entá mayor optimismu hai con Riverland porque’l festival va celebrase en Les Arriondes, del 23 al 25 de xunetu.

La ventaya de dambos eventos, apunten dende la productora, ye que los cartelos tán formaos por artistes nacionales, poro, nun se depende de les circunstancies que’l coronavirus pue provocar n’otros países.

Nesti tipu de situaciones, apunten dende 2Monkeys, los eventos culturales parten con ventaya al respective de les cites deportives marcaes pa la primavera y el branu.

Normalidá que dependerá del desendolque de los acontecimientos.