Webcams
Buscar
Una muyer que nun abandonó la llucha
Morrió Anita Sirgo. La histórica militante del Partíu Comunista morrió esta madrugada a los 93 años. Sindicatos, dirixentes políticos y sociedá civil destaquen la so defensa de les llibertaes y el so papel na fuelgona de los mineros del 62. La capiya ardiente queda instalada na sede de CCOO del Nalón.
Sirgo ye emblema de la llucha obrera y antifascista. De familia minera, Anita Sirgo foi la responsable de movilizar a les muyeres na Fuelgona del 62, convirtiéndose nún de los motores del éxitu de la so llucha.
Anita y les muyeres de la cuenca minera entamaron piquetes y impidieron que se volviere a los pozos, pero la so acción tuvo represalies. Foi encarcelada y rapada a tirones. Sufrió tortures y quedó sorda d’un oyíu.
La persecución obligóla a exiliase en París, onde tuvo dos años. En 1966 volvió a Asturies, onde foi prindada y apresada por causes militares.
La so incesante llucha viose afitada en documentales y curtios como 'A golpe de tacón', d’Amanda Castro.
El 20 de xineru Sirgo diba cumplir 94 años. Los últimos fueron homenaxes, como en Llangréu l’añu pasáu, cuando se descubrió una placa nel Centru Social de Lada, qu’agora lleva’l so nome. Más de 90 años nos que nunca nun dexó de defender los sos ideales.
