Muerre Ismaíl Kadaré, Premiu Príncipe d'Asturies de les Lletres en 2009

L'escritor ye "el mayor monumentu de la cultura albanesa"

Muerre a los 88 años l'escritor albanés Ismaíl Kadaré, galardonáu col Premiu Príncipe d'Asturies de les Lletres en 2009. L'autor morría güei nel hospital de Tirana, tres ser ingresáu d'urxencia por un fallu cardiacu.

Narrador, ensayista y poeta, Ismaíl Kadaré foi unu de los grandes autores de la lliteratura europea del sieglu XX. La so reconocida trayectoria llevólu a consiguir el Premiu Príncipe d'Asturies de les Lletres nel añu 2009.

El xuráu de los Premios Príncipe d'Asturies xustificó'l galardón asegurando que Kadaré narraba con un llinguaxe cotidianu, pero enllenu de lirismu, la traxedia de la so tierra. Buscaba inspiración nos sos raigaños, pero'l so mensaxe trespasaba llendes. La so obra tornóse a más de 40 idiomes y consolidóse como una voz universal escontra los totalitarismos.

L'autor d'obres como 'El concierto', 'El palacio de los sueños' y ' El accidente' foi en numberoses ocasiones aspirante al premiu Nobel, un galardón que finalmente nunca llegó a consiguir. Sicasí, esti premiu nun-y fixo falta pa ganar el respetu y l'almiración de los llectores.

El primer ministru d'Albania, Edi Rama, describió al escritor muertu como "el mayor monumentu de la cultura albanesa".