Webcams
Buscar
Fundador del Muséu Etnográficu de Grandas de Salime
José María Naveiras Escanlar, Pepe'l Ferreiro, morrió güei n'Auguasmestas, nel conceyu de Somiedu, onde vivía cola so esposa tres una llarga enfermedá a los 78 años.
La so figura ta venceyada a la creación del Muséu Etnográficu de Grandas de Salime que fundó en 1984, instalación que nació so la so colección etnográfica arrexuntada col máximu respetu pa la vida rural de la zona y los oficios tradicionales.
Tamién foi unu de los impulsores del Castru del Chao Samartín.
Pepe'l Ferreiro foi vistu siempres por ello como un guardián de la cultura asturiana, de los oxetos tradicionales, del caltenimientu d'una forma de vivir.
Güei nel so conceyu natal la so figura ye recordada con tol respetu posible. Atrás queda'l discutiniu sobre la so xestión del Muséu qu'acabó nos xulgaos reconociendo los sos derechos. Toca despidir a un vecín que, dicen, punxo a Grandas nel mapa.
El so fallecimientu da inda más importancia a un Muséu referente nacional y qu'alluga una colección de cerca de 20.000 pieces.
Dende'l Gobiernu del Principáu, el presidente Adrián Barbón espresó'l so pésame por esti fallecimientu y destacó que la so perda dexó buelga n'Asturies.
