Nin restallón nin Danza Prima en Xixón

Fin de fiesta de la Selmana Grande

Fin de fiesta de la Selmana Grande en Xixón, ensin restallón y Danza Prima como ye tradicional un día como güei. Ayeri la policía local denunció cinco fiestes en cases y a tres establecimientos por incumplir l’horariu de pieslle.

Güei yera día de baillar la Danza Prima en San Llorienzo, de dase la mano y mirar a la mar en recuerdu de los emigrantes, asina yera va un añu. Güei les marques de distanciamientu na sablera xixonesa recuerden que tamos cola normativa de distanciamientu del COVID.

Dalgunos vecinos recuerden que va un añu 183 kilos de pólvora disparaben 460 unidaes de fueu en siete minutos pa marcar el final d’una fiesta.

Esti añu namás se caltuvo la misa de Begoña nos Carmelites, con distancia de seguridá y aforu amenorgáu. Como representante municipal, foi la conceyala de Ciudadanos Mara Simal.

Munchos restauranes colgaron el cartelu d’enllenu. Ye fin de selmana festivu en toa España y eso nótase pero, al respective del añu anterior, siguen ensin tener la mesma afluencia de veceros, y los locales na contornada d’El Muro noten la falta de festeyos na ciudá.

La Selmana Grande de Begoña mira yá a 2021.