Poreñu, en Villaviciosa, Pueblu Exemplar d'Asturies 2017

Modelu pal mundu rural asturianu

Poreñu, un pueblu pequeñu de la parroquia de Celada, nel conceyu de Villaviciosa, con abondos hórreos centenarios, foi reconocíu güei col Premiu al Pueblu Exemplar d'Asturies 2017, premiu nel que nesta edición participaben 25 candidatures.

Esti pueblu, que tien ente'l so patrimoniu una ilesia del sieglu XIII y una gran actividá asociativa y vecinal, malapenes cunta con un centenar de vecinos, 70 cases y una trentena d'hórreos y paneres espardíes nun espaciu rural dende'l que se pue ver dende La ría de Villaviciosa a Los Picos d'Europa.

El xuráu que güei dio'l Premiu al Pueblu Exemplar d'Asturies 2017 a Poreñu emponderó esti pueblu pequeñu del conceyu de Villaviciosa como modelu pal mundu rural asturianu.

L'acta d'esti premiu añal que convoca la Fundación Princesa d'Asturies dende 1990, y al qu'aspiraben 25 candidatures, destaca que Poreñu supo caltener "vives les sos tradiciones", al empar que desendolcó dende va décades "un potente movimientu asociativu qu'al traviés del trabayu comunitariu ameyoró a esgaya les condiciones de vida de los sos vecinos".

Too ello fai de Poreñu "un modelu pal mundu rural asturianu", resalta l'acta lleíu nel Hotel de la Reconquista d'Uviéu pol presidente del xuráu, l'empresariu Francisco Rodríguez García.

El xuráu recordó la figura d'Adolfo Barthe Aza, patronu de la Fundación y miembru d'esti tribunal dende'l so entamu en 1990, que finó'l mes de marzu pasáu y que "impulsó de mou brillante y comprometíu la proyección d'esti premiu".