Un llibru recueye la evolución de los 100 años de la quesería La Peral

El testu homenaxa a la saga familiar que llevó'l quesu azul pel mundu

Antonio León foi’l fundador va 100 años de la quesería La Peral, la empresa familiar que dende’l conceyu más rural de la fastera d’Avilés, el d’Illas, llevó’l quesu azul pel mundu. Una historia que se narra agora nun llibru del historiador Román Antonio Álvarez por mor del centenariu.

Y ye que la historia de 'Quesos La Peral' ye la d’una empresa na que güei yá trabaya la quinta xeneración y que produz al añu más de 160.000 kilos de quesu, de los que 10.000 van pal estranxeru; y que supunxo la industrialización del conceyu d’Illas.

Un llibru homenaxe a una saga familiar asoleyáu pola editorial avilesina Nieva que, al traviés de semeyes y documentos históricos, cunta la evolución de la producción y les anécdotes d’un quesu mui popular, que se comió hasta na boda de los reis d’España d’anguaño.