Una obra recuerda al Rector Alas, home xustu y "exemplu de políticu puru"
![Obra de teatro El Rector](https://www.rtpa.es/fotos//18/04/20180410143328_rector180410vtr.jpg)
El Teatru Campuamor acoyerá’l 28 y 29 d’abril el so estrenu total
El Teatru Campuamor acueye’l 28 y 29 d’abril l’estrenu total de "El Rector", una obra de teatru escrita pol ex-presidente autonómicu Pedro de Silva que narra’l prindamientu y muerte del rector de la Universidá d’Uviéu Leopoldo Alas Argüelles, un home "xustu" que foi "exemplu vivu del políticu puru".
Dirixida por Etelvino Vázquez, "El Rector" ye un análisis teatral del prindamientu y muerte, en 1937, de "un xustu purísimu", d’una persona que, según el so autor, ye’l "exemplu vivu de lo que pudo ser la República si unos y otros lu dexaren", asina como "exemplu vivu del políticu puru que namái atiende a los intereses xenerales" y que "llega a inmolase al serviciu de les sos idees ensin escaeceles nunca".
A xuiciu de De Silva, que na so vida política atopóse sobre manera con xente "decente" y non con "vividores nin chanchulleros", enagora ye "mui pertinente" poner delantre de la xente a un políticu del tipu d’Alas "como líquidu de contraste p’analizar a tolos demás".
El relatu de la muerte del Rector, que se narra en siete actos, escuende l’enigma del que lu mata: mátalu Vetusta, mátenlu en memoria de so padre, Leopoldo Alas "Clarín" o como elementu paradigmáticu de la represión, plantega De Silva.
La obra nun da rempuestes, pero proporciona elementos pa que caún faga’l so xuiciu, esplicó l’autor.
Y ye que "El Rector" ye "un poco más que pura memoria histórica", porque trata de recuperar imaxinariamente los fechos "con tol so volume de vida", señaló l’autor, que dixo que la obra ye un "intentu d’axuntar la verdá histórica y la verdá lliteraria".