Vuelve a Xixón el festival aereu tresformáu na 'Fiesta del Cielu'

Habrá un festival de cometes, globos aerostáticos, bautismos de vuelu o parapentes

El Festival Aereu Internacional que Xixón agospia tolos branos volverá a celebrase dempués de dos años de parón pol COVID-19 tresformáu na "Fiesta del Cielu", na que compartirá protagonismu con cometes, drones o páxaros.

“Queremos esfrutar más del nuestru cielu y más esti branu de 2022 nel que, dempués de dos años llargos de pandemia, podremos recuperar dafechu’l branu xixonés”, afirmó l’alcaldesa, Ana González, na presentación de la 'Fiesta del Cielu' que se celebrará del 15 al 24 de xunetu.

La rexidora afirmó qu’esta nueva fiesta “naz de la fusión de lo vieyo colo nuevo” y “medra porque esti branu Xixón tien que medrar”.

El primeru de los cambeos ta en que pasará a desendolcase en 12 díes frente a la xornada avezada, pero tamién habrá un festival de cometes, globos aerostáticos, bautismos de vuelu o parapentes.