William Kentrisge,Premiu Princesa de les Artes

"Ye unu de los artistes más completos y anovadores del panorama internacional"

El polifacéticu creador sudafricanu William Kentridge (Johannesburgo, 1955), conocíu polos sos dibuxos, pintures, grabaos, 'collages', escultures y fotografíes, pero tamién polos sos inxerimientos nel teatru, la ópera y la música, foi distinguíu güei n'Uviéu col Premiu Princesa d'Asturies de les Artes 2017.

Según el xuráu, ye "unu de los artistes más completos y anovadores del panorama internacional", y amás destaca por tar "comprometíu dafechu cola realidá".

La candidatura d'esti artista comprometíu social y políticamente impúnxose ente les 43 procedentes de 19 países que nesta ocasión optaben a esti premiu, el primeru de los ocho qu'añalmente concede la Fundación Princesa d'Asturies.

La so candidatura foi propuesta por Beningno Pendás García, miembru del xuráu del Premiu Princesa de Comunicación y Humanidaes 2017, y Raquel García Guijarro, xerente del Centru d'Estudios Políticos y Constitucionales.

Ente'l xuráu, la editora y comisaria d'arte contemporaneu Elena Ochoa, una veterana d'esti premiu, dio-y el so respaldu dende l'entamu yá que, según reconocía al entamar les deliberaciones, trabayó "en munches ocasiones" con esti creador sudafricanu col que ta preparando pa ochobre una esposición nel Reina Sofía de Madrid.

Nacíu en Johannesburgo en 1955, sos padres exercieron como abogaos especializaos nes víctimes del apartheid y so padre ocupóse de la defensa de Nelson Mandela, circunstancia que determinó la so formación universitaria -Ciencies Polítiques- enantes de dedicase al arte.

Nos años ochenta treslladóse a París pa estudiar teatru na Escuela Internacional de Teatru Jacques Lecoq y trabayó como director artísticu en series de televisión, enantes d'entamar a crear animaciones dende los dibuxos de so.

Dende los años noventa alternó la práctica del dibuxu col cine y el teatru, convirtiéndose nun artista multidisciplinar que cultivó, amás, la escenografía, el collage, el grabáu, la escultura y el videoarte.

Kentridge, qu'escoyó'l dibuxu como vehículu espresivu d'emociones y metáfores al rodiu de la historia y la realidá sociopolítica sudafricana, diose a conocer fuera del so país tres la so participación na feria Documenta X de Kassel (Alemaña, 1997) y nes bienales de São Paulo (Brasil, 1998) y Venecia (Italia, 1999).

Dende entós, los sos dibujos animaos o "películes dibuxaes", como les nomen dalgunos especialistes, percorrieron les sales de los centros d'arte más renomaos del circuitu internacional.

Dende 2003, Kentridge entamó a interesase pola escultura y la videoinstalación y a inxertar referencies al teatru, la ópera y el cine nos nuevos trabayos.

Na última década amosó la so producción artística nel MoMA (Nueva York), que-y dedicó una retrospectiva en 2010, l'Albertina Museum (Viena), el Louvre (París) y el Muséu de Belles Artes de Budapest, ente otros museos.

El Premiu Princesa d'Asturies de les Artes ta destináu a reconocer a aquellos "con una xera que contribuya, de manera estraordinaria y a nivel internacional, al progresu y bienestar social al traviés del cultivu y perfeccionamientu de la cinematografía, el teatru, la danza, la música, la fotografía, la pintura, la escultura, l'arquitectura y otres manifestaciones artístiques".

L'añu pasáu, esti premiu foi pa l'actriz y directora Núria Espert, que s'axuntó a una nómina de la que tamién formen parte Francis Ford Coppola, Michael Haneke, Norman Foster, Woody Allen, Paco de Lucía, Vittorio Gassmann o Bob Dylan.

L'actu d'entrega de los Premios Princesa d'Asturies fadráse, como ye tradicional, n'ochobre nel Teatru Campoamor d'Uviéu, nuna solemne ceremonia presidida polos Reis.

Cada Premiu Princesa d'Asturies ta dotáu cola reproducción d'una escultura de Joan Miró -símbolu representativu del premiu-, la cantidá en metálico de 50.000 euros, un diploma y una insignia.