XEGA homenaxea a los pequeños conceyos por convertir a Asturies nuna rexón más igualitaria

Entrega del 'Lladriyu Rosa' al alcalde d'Uviéu, poles sos inesistentes polítiques escontra la LGTBIfobia

L'actu institucional de XEGA pol Día del Arguyu Lgtbi celebróse esti mediudía en La Felguera, como homenaxe d'esta asociación a los pequeños conceyos que, aseguren, trabayen pa convertir Asturies nun llugar más diversu y colos mesmos derechos pa toles persones.

Nel actu diose'l 'Triángulu Rosa' a les conceyalíes d'Igualdá pol so gran llabor escontra la LGTBIfobia y el 'Lladriyu Rosa' al alcalde d'Uviéu, por nun contribuyir a faer d'esta rexón un llugar más igualitariu.

El 'Lladriyu Rosa' de XEGA en 2021 quedó ensin recoyer. Alfredo Canteli, alcalde d'Uviéu, nun foi al actu d'entrega del galardón, que se-y da poles sos inesistentes polítiques sociales escontra la LGTBIfobia.

Les conceyalíes d'Igualdá de Castrillón, Mieres, Gozón y Llangréu recueyen el 'Triángulu Rosa' pol so trabayu diariu pa construyir pequeños conceyos, grandes n'inclusión y diversidá.

Sol lema 'Tolos derechos pa toles persones' , el colectivu XEGA celebra anguaño l'arguyu Lgtbi amenorgáu pola situación sanitaria y alloñáu de les grandes capitales, p'agradecer l'esfuerzu de los conceyos que, con pocos recursos, faen grandes meyores.