Xornada de preparativos n'El Puertu

TPA retresmite la entrega del Premiu al Pueblu Exemplar d'Asturies 2021

Xornada de preparativos n'El Puertu, en Somiedu. Los operarios monten l'escenariu que mañana va allugar los discursos y en cada esquina del pueblu hai pistes qu'apunten a que mañana nun va ser un día más. El Puertu va recibir el Premiu al Pueblu Exemplar d'Asturies 2021.

La mayoría de los vecinos siguen cola vista puesta nel cielu yá que, un día soleyeru va dexar, por casu, esfrutar del nuevu mirador, construyíu en tiempu récord y dende'l que pue vese'l paisaxe agroganaderu del que Somiedu ye exemplu.

Paisaxes y muncho más va ser lo que los vecinos d'El Puertu amuesen a los reis y a les sos fíes. Un exemplu d'un pueblu, que trabaya xuníu pa que mañana seya un día especial.

TPA emite en directo, dende El Puertu, en Somiedu, l'actu d'entrega del Premiu al Pueblu Exemplar d'Asturies 2021. El programa, presentáu pola periodista Arantza Uruburu, va ufiertar el percorríu de la Familia Real pel pueblu somedanu.