Prevése una investigación llarga del accidente n'El Musel

Controláu'l vertíu de combustible nel cai

La investigación p'afitar cuála foi la causa que provocó'l fallecimientu de dos trabayadores pola cayida de dos grúes n'El Musel va ser llarga. Asina s'asegura dende la Guardia Civil.

La toma declaraciones a los cuatro mancaos pol sucesu entá nun empezaron.

El vertíu de combustible provocáu pol accidente ta controláu, asina lo apunten dende l'Autoridá Portuaria.

La delegada del Gobiernu dixo que la Guardia Civil investiga les causes d'esi accidente y confirmó qu'inspección de trabayu yá tuvo ellí. Confía en que se cumpliera la normativa llaboral.

Xixón ta de llutu pol accidente n'El Musel

Xixón ta de llutu tres l'aciar accidente que tuvo llugar ayeri nel Musel. Los compañeros de los dos trabayadores muertos tán mui afectaos, rotos de dolor y estrozaos pola traxedia que cutió a la empresa y a la ciudá.

Roberto Martínez Laguno, de 49 años y del barriu d'El Coto, llevaba dellos años trabayando na empresa de montaxes, onde yera mui apreciáu y queríu por tola plantiya.

Per otru llau, el mozu César Méndez Pernía, de 23 años, vivía nel barriu d'El Llano. Fuera contratáu apocayá tres rematar les sos práctiques. Los sos compañeros de trabayu destacaben esta mañana la so profesionalidá y el so futuru prometedor.

El mancáu más grave, treslladáu al HUCA, foi interveníu quirúrxicamente y, nestos momentos, el so pronósticu ye reserváu. L'otru mancáu grave ta recuperándose nel Hospital de Xove, tres sufrir contusiones nun brazu.

Dende UXT de Xixón esixen la revisión de la Llei de Prevención de Riesgos Llaborales, y piden dotar de más personal y de medios a inspección de trabayu pa faer un control de les empreses más fondu.

Los sindicatos UXT y CCOO d'Asturies convocaron una concentración pal próximu martes na cai Santa Teresa d'Uviéu, a les 12:00. L'oxetivu d'esta manifestación ye reivindicar la salú llaboral.