Liberada una muyer retenida pol home nuna vivienda de Mieres

L'home, de 57 años, foi prindáu como supuestu autor d'un delitu de violencia de xéneru

La Guardia Civil rescató en Mieres a una muyer que pasó la nueche retenida pol home, de 57 años que foi prindáu, informó esti xueves la Comandancia d’Asturies.

L’institutu armáu punxo en marcha un operativu dempués de la llamada fecha pola muyer pidiendo auxiliu, sobre les dos de la madrugada.

Siguiendo’l rastru del númberu de teléfonu pel que se fizo la llamada, algamóse saber que venía d’una zona rural de Mieres, concretamente Santuyano, onde foi una patrulla de seguridá ciudadana que pudo alcontrar el domiciliu.

Los guardies civiles escucharon los glayíos d’auxiliu de la muyer, vinientes del segundu pisu d’un inmueble, onde un home asomó a una ventana glayando que diba matala al empar qu’amenazaba a los axentes si entraben al interior.