Muerre un trabayador de 60 años por un golpe na cabeza nel Polígonu de Cancienes

Barbón pide un "análisis fondu" sobro la siniestralidá llaboral

Un trabayador de 60 años morrió esti xueves al recibir un golpe na cabeza nuna empresa allugada nel Polígonu de Cancienes, en Corvera, informaron fontes de la Guardia Civil.

Los servicios sanitarios movíos al llugar intentaron ensin ésitu alicar al trabayador y certificaron el so fallecimientu a les 9:00 hores.

El muertu ye un vecín d'Avilés de 60 años, apuntaron les mesmes fontes, qu’afitaron qu'un equipu de Policía Xudicial de la Guardia Civil d'Avilés fíxose cargu de la investigación.

El presidente del Principáu, Adrián Barbón, sorrayó esti xueves la necesidá de faer "un análisis fondu" sobro la siniestralidá llaboral y sobro los últimos accidentes rexistraos na comunidá autónoma.

En declaraciones a los periodistes en Navia, onde visitó la fábrica d’Ence, Barbón llamentó la "malísima noticia" del accidente mortal sufríu esti xueves por un trabayador en Corvera y dio’l so pésame a familiares y conocíos de la víctima.