Deteníu un trabayador d'una funeraria d'Avilés que robaba xoyes a los difuntos

El deteníu, un vecín d'Avilés de 44 años, robó xoyes valoraes en más de 5.500 euros

La Policía Nacional d'Avilés prindó a un home de 44 años, ensin antecedentes y trabayador d'una funeraria, por robar xoyes a difuntos aprovechando los momentos en que quedaba a soles colos cuerpos y ensin que los familiares se decataren de los fechos.

Los axentes siguen investigando la procedencia de cuatro xoyes de distinta natura qu'entá nun fueron reclamaes ente los oxetos prindaos, polo que pide la collaboración ciudadana pa esclariar la so propiedá, informó esti llunes la Policía.

La Brigada de Policía Xudicial de la Comisaría Local d'Avilés detectó a mediaos del mes de setiembre la venta de numberoses xoyes d'oru que, poles sos característiques en tipu, diseñu y inscripciones, nun paecíen tar rellacionaes col vendedor, polo que s'empecipió una investigación col envís d’afitar el so orixe.