Prisión pa los tres deteníos en Grau por causar daños n'establecimientos y vehículos

La Fiscalía pide l'ingresu en prisión provisional comunicada y ensin fianza al entender qu'esiste riesgu de reiteración delictiva

La Guardia Civil prindó a tres vecinos de Grau por presuntamente romper les llunes de dos establecimientos públicos de la villa y causar daños intencionales en 32 vehículos la madrugada del pasáu día 19 d'ochobre, pa los que'l Xulgáu númberu 1 d'Instancia y Instrucción de Grau decretó esti llunes l'ingresu en prisión.

La Guardia Civil detalló nun comunicáu que los deteníos, que cunten con antecedentes por delitos escontra'l patrimoniu, presuntamente rompieron los ventanos de los vehículos y llegaron a apoderase d'oxetos que taben nel interior en dalgún de los casos.

La Benemérita informó de que, tres tomar declaraciones tanto de víctimes como de testigos y proceder al visionáu de cámares de seguridá, pudo identificase, gracies a la collaboración ciudadana, a los supuestos responsables de los fechos, que fueron deteníos a última hora de la tarde d'ayeri.