Prisión pa una muyer por morder y mancar con un arma blanca a la so ex-pareya en L.lena

Los fechos podríen ser constitutivos d'un delitu de mancadures

El Xulgáu d’Instrucción númberu dos de L.lena ordenó esti sábadu prisión provisional, comunicada y ensin fianza pa una muyer prindada na nueche del xueves por mancar con un arma blanca y morder a la so ex-pareya nesti pueblu.

Según informó’l Tribunal Cimeru de Xusticia d’Asturies, la xueza de guardia tomó esta decisión d’alcuerdu cola Fiscalía que solliñó qu’hai indicios abondos de que l’arrestada (Brasil, 1984) causare mancadures por arma blanca nel pescuezu y el brazu izquierdu de la víctima y por un mordiscu nel brazu derechu, con pronósticu menos grave.

El Ministeriu Fiscal considera que los fechos podríen ser constitutivos d’un delitu de mancadures y solicitó la midida cautelar al entender qu’hai riesgu de fuga y de reiteración delictiva.