Rescatáu un home de 34 años que pasó 20 díes inmovilizáu na so casa de La Felguera

L'home taba nuna situación d'estrema debilidá

Un home de 34 años, vecín de La Felguera, foi rescatáu n’estáu críticu pola Policía Nacional dempués de pasar venti díes echáu na cama y ensin comer, polo que taba nuna situación d’estrema debilidá, según fontes policiales.

Un vecín esmolecíu pola falta de rempuesta a les sos llamaes y polos constantes lladríos del so perru foi’l que dio l’avisu a la Sala del 091 de la Policía Nacional la nueche del sábadu pasáu, 18 de xineru.

Una patrulla de la Policía Nacional de Llangréu foi hasta la so casa y, col sofitu d’una dotación de bomberos, entró dientro de la vivienda, na qu’alcontraron al home con graves problemes respiratorios y signos severos de deshidratación porque, según dixo a los axentes, llevaba venti díes ensin poder movese de la cama.