Un españíu de gas dexa en Mieres tres mancaos graves, 15 leves y un edificiu esbarrumbáu

Ocho de los 18 mancaos recibieron l'alta hospitalaria y descarten qu'haya atrapaos nel edificiu

Dieciocho persones mancáronse, tres d’elles de gravedá, nun españíu provocáu por una fuga de gas nun edificiu de dos plantes, más baxu, asitiáu na cai Ramón y Cajal de Mieres que s’esbarrumbó dafechu, informa’l Serviciu d’Emerxencies del Principáu (SEPA).

L’españíu provocó tamién llaparaes nun edificiu anexu y dalgunos estrozos n’otru más y enllenó de cascotes la contornada del inmueble esbarrumbáu. Ente los sos restos va trabayar la Unidá Canina de Rescate por si pudiera haber dalguna víctima.

El Centru de Coordinación d’Emerxencies del 112 Asturies recibió a les 16:00 l’avisu de qu’hubiere un gran españíu y qu’había polo menos siete persones mancaes.