Los desallugaos pola esplosión en Mieres empiecen a volver a les sos cases

La oficina de consumu municipal va ufiertar asesoramientu a los afectaos pol españíu de gas

El cuasi mediu centenar de persones desallugaes de les sos viviendes tres la esplosión de gas que'l llunes esbarrumbó un edificiu de Mieres y que causó dieciocho mancaos, tres d'ellos graves, van empezar esti miércoles a tornar a les sos cases pasu ente pasu.

Según informó'l Conceyu mierense, el reasitiamientu va empezar nes viviendes asitiaes fuera de la zona más afectada pol españíu y va facese xunto a técnicos municipales.

El consistoriu prevé que'l restu de persones desallugaes, tanto les que tán reasitiaes na residencia universitaria como quien ta con familiares, van poder volver a les sos viviendes a partir de la tarde del vienres, teniendo en cuenta "criterios técnicos y la valoración de cada vivienda priorizando en tou momentu la seguridá".