Camuda la so actitú l'home atrincheráu qu'amenazaba con quemase en Grau

El vecín salió voluntariamente de la caseta dempués de falar col alcalde

L’home de 59 años que siguía atrincheráu dende última hora de la tarde d’ayeri con una garrafa de gasolina dientro d’una caseta de preseos nel conceyu asturianu de Grau y amenazaba con quemase si nun lu escuchaba l’alcalde, dexó la so actitú pasáu’l mediudía d’esti miércoles, informó la Guardia Civil.

L’home, que sí pudo falar al final dellos minutos col alcalde, José Luis Trabanco, salió voluntariamente de la caseta na que taba y, dempués d’abrazase al so hermanu, fuxó, anque foi alcanzáu por dellos axentes de la Guardia Civil.

Darréu, foi lleváu polos axentes hasta los servicios médicos que se desplazaren a la zona y dempués de ser atendíu nel llugar decidióse que nun fai falta llevalu a un centru hospitalariu.

Nel episodiu, nel qu’un negociador de la Guardia Civil tuvo con él delles hores en contactu, al paecer tuvo motiváu por un problema venceyáu con una decisión tomada pol Ayuntamientu al respective d’una finca de la so propiedá.

La caseta na que s’atrincheró taba nuna zona aisllada conocida como El Molín d’Agostu, xunto a los depósitos d’agua de Grau, a unos 30 kilómetros d’Uviéu, polo que, según l’Institutu Armáu, la situación taba "exenta de riesgu pa terceres persones". 

L’avisu de lo que taba pasando diolu la muyer del home, que foi a les dependencies de la Guardia Civil de Grau pasaes les 20:00.