Ardines morrió dempués de qu’unu de los sos agresores echára-y mano al pescuezu

El conceyal trató de fuxir dempués de llevar un golpe per detrás

Javier Ardines recibió un golpe na tiesta per detrás, fuxó unos 70 metros, foi derribáu y finó dempués de qu’unu de los sos agresores echára-y mano al pescuezu.

Fontes cercanes al entornu de la familia del conceyal d’Izquierda Xunida confirmaron a TPA el relatu del ataque mortal que sufrió na madrugada del pasáu 17 d’agostu.

Esi día, Ardines salió de so casa camín del cai de Llanes pa entamar la so xornada llaboral nel Bramadoria y atopó unes valles nel camín al llau de so casa. Baxó del coche pa quitales y recibió un golpe per detrás.

A pesar del impactu pudo fuxir hasta que foi derribáu y, darréu, asesináu yá nel suelu. Según pudo saber TPA, l’autor material de la muerte echó-y mano al pescuezu p’acabar cola so vida.